Gün.Az xəbər verir ki, bu barədə təhsil naziri Misir Mərdanov “Azərbaycan-2020: gələcəyə baxış” İnkişaf Konsepsiyası çərçivəsində Milli təhsilin gələcəyi ilə bağlı dəyirmi masada deyib.

Nazir deyib ki, 2004-07-ci illər ərzində ikinövbəli təhsilin payı 73%-dən 44%-ə enib. Onun sözlərinə görə, hazırda bütün şagirdlərin yalnız 21%-i ikinci növbədə təhsil alır.

Nazir vurğulayıb ki, 2004-cü ildən 2011-ci ilə qədər Prezident İlham Əliyevin rəhbərliyi altında ölkədə təhsillə bağlı aparılan Dövlət proqramlarının əksəriyyəti ümumtəhsil müəssisələrində təhsil şəraitinin yaxşılaşdırılması və burada maddi-texniki bazanın inkişaf etdirilməsi ilə bağlı olub.

“2004-07-ci illər ərzində dövlət proqramları çərçivəsində və Heydər Əliyev Fondunun gördüyü işlər çərçivəsində 550 min yerlik 2200 məktəb binası tikilib və ya əsaslı təmir edilib, 708 ümumtəhsil müəssisəsi müasir avadanlıqla təchiz olunub, 400 məktəbdə tədris laboratoriyaları qurulub, 700-dən çox məktəbdə isə istilik sisteminin yaxşılaşdırılması həyata keçirilib”.

Rüfət Əhmədzadə
Gün.Az